"Кӯдыроҥгыр" марий калыкым иктеш чумыра

"Кӯдыроҥгыр" йырже оҥгыр йӯк гаяк моло мурызо-влакымат чумыра. Влад Николаев ден Эльвира Попова нерген "пар оҥгыр гаяк улыт" манын шоналташ лиеш. Влад шкеак семым возкала да Эльвира дене коктын пырля мурат. Марий эстрадыште нуно кызыт шӯдыр гаяк волгалтыт.

"Кӯдыроҥгыр" кас шуко поро пашам шуктен шога. А эн тӯнжӧ марий калыкым иктеш чумыра. Паша деч вара ноен толмеке, мӧҥгыштӧ веле каналташ ыле, но уке, калык чон-кумыл дене "Кӯдыроҥгыр" лӯман касыш вашка. А касыш ӯжмӧ уна-влак эре тӯрлӧ да тӯрлӧ лийыт. Мондаш огеш лий поэт Валентин Осипов-Ярча дене вашлиймашымат. Поэт поэтак! Шӯм-чонжо сылнынымут тӯняште пуйто кӯдыроҥгыp гаяк яндар йӯкшӧ дене юарлен колта. Ты вашлиймаштат тыманмеш у почеламут шочо:

Таче тиде касыш
Погынен гын "Кӯдыроҥгыр", 
Сылне марий сем йоҥго! 
Лек-ян, пошкудем, покшеке, 
Мондо ойгым, лоҥын,
Тыште марий койыш,
Тыште марий-влакын ойышт 
Шошымсо Какшан гаяк шарла.
"Кудыртегыр"  тукым Oҥгыр, 
Пеледалтын, тӯзланалын,
Ош кугезынан йӯлажым
Таче угычын шара!"

Чынак, ош кугезынан йӯлажым ме, марий калыкын шочшыжо-влак, ончыклык тукымлан кучыктышаш улына. Мурызо, Марий Элын калык артистше Иван Смирнов келге шонымашан мурыж дене шӯм-чоннашке чыла тидым шыҥдара.

"Марий ушемын" Йошкар-Оласе пӧлкажын пашаже уло кундемнам авалта. "Кӯдыроҥгыр" кас кажне районлан посна пӧлеклалташ тӯҥалын. Пеш чот чаплын эртеныт Морко ден Шернур, Курыкмарий ден Волжский район-влакын касышт! А Пошкырт кундемлан полеклалтше "Кӯдыpоҥгыp" маpий йуланам, тукым вожнам да икоян улмынам пеҥгыдемдыше кас семын лийын. (Фотосӯретым тыште ончыза).

У тукымлан ӯшанен кучыкташ уло мотор Марий кундемна, уло тудын йӯлаже. Тек ончыклык илышнам кечан ош кече, чевер-ал ӯжара, лыжга лай мардеж, яндар памашшинча да сылне марий муро курымеш волгалтен шогат! (Фотосӯретым тыште ончыза).
* * *

"Kӯдыpoҥгыp" касым эртараш поро чонан ӯдыр-рвезе-влак полшат. Теве нунын лӯмышт: Елена Атаева, Татьяна Гребнева, Галина Ефремова, Валерий Иванов, Геннадий Иванов, Галина Калинина, Валентина Макарова, Тамара Патрушева, Светлана Пехметова, Роза Семелина, Николай Семенов, Арслан Сергеев, Зоя Яковлева, Алевтина Ямбарсовао.