Кӯдырчан йӯр годым шочын "Кӯдыроҥгыр"

"Кӯдыроҥтырын" аваже, негызым пыштышыже - Ираида Александровна Степанова. Ираида Александровна тудо пагытыште калыкым иктеш чумыраш кӯлмым умылен, шижын моштен да ты пашалан пижын. Tӯҥалме сомыл арам лийын огыл. Икымше кас гычак калыкын кумылжо почылтын, ынде кок ий утла тылзе еда касыш ятыр eҥ погына.

Эн первый касым эртарыме вер - М.Шкетан лумеш Марий кугыжаныш театрын кӯполатше.

Ончалза теве фотосӯретым. Могай кугу тудын ешыже! Шочмо-кушмо Марий кундемнан кажне лукыштыжо "Kӯдыроҥгырын" поро да ӯшанле йолташыже-влак илат. Вашла пагален, икоян кумыл дене, кажне тылзын ик гана вашлияшак тыршат. Тачысе пуламыр пагытыште марий йӯлана, марий йылмына, марий кумылна, койыш-шоктышна, пашам йӧратымына мӯкш еш семынак мемнам иктыш чумырат .

Лач тыгодымак ончыклык илышна нерген чон йӯлен кутырымаш, шонкалымаш лектеш.

"Kӯдыpоҥгыp" касым ынде ятыр жап Нина Федоровна Максимова вӯда. Касыш толшо уна-влаклан чон поянлыкшым пӧлекла. А эн ондакше Виталий Бурков дене тиде сомыллан пижыныт.

Могай кумыл дене "Kӯдыpоҥгыp" мемнам шкеж деке ӯжеш? Эн ондак тыште илыш вий шижалтеш. Артист, поэт, мурызо-влак шке усталыкышт дене калык чоным ылыжтат, Марий кундемнан да моло вереат чапланыше мурызына-влак у мурым пӧлеклат, порылык шӯлышым йырваш шарат, лач тыгодым кумыл шулдыраҥеш.

Пагален ойлаш кӯлеш Марий Элын сулло артисткыже да чолга журналист Раисия Данилова да лӯмлӧ поэтесса Мардан Рая нерген. "Kӯдыpоҥгыp" касыш толшо уна-влак нунын творчествыштым кӯкшын аклат.

А тиде фотосуретыште журналист Светлана Пехметовам, Марий Элын калык поэтше Семен Николаевым, поэтесса, Марий Эл культурын сулло пашаеҥже Зоя Дудинам, самодеятельный композитор да мурызо Вячеслав Осипoвым ужыда. Кажныжын чонжо марий калык верч йӯла. Шуктен толмо пашашт икте-весынам аклаш, пагалаш, йӧраташ туныкта. Каласаш кӯлеш, Семен Николаев кушкын толшо поэт-влакым сылнымут тӯняште илаш туныкта. Чынак, тудын чонжо моткоч чот марий калык верч тургыжлана. Очыни, садланак марий калык дене вашлиймашке тудо шӯм вургыж вашка, серыпле почеламут корнылаж дене илышын сай-осалжым, куан ден ойгыжым почын пуа. Тыгай кумыл денак Семен Васильевичын тунемшыже Зоя Дудина калык ончыко лекташ ок ӧр. Светлана Пехметова "Марий Эл" газет гоч марий калыкым "Марий ушемын" пашаж дене палдарен шога. Моло кундемлаште илыше марий-влакынат илыш-йӯлаштым газет гоч ончыкта.

А Вячеслав Осипов нерген поснак поро шомакым ойлымо шуэш. Волжский кундемын талант памашыже тудын мурсемже дене шыргыктен йога манын, кугешнаш лиеш! Вячеслав Осипов самырык, мураш тӯҥалше мурызо-влакым кумда сценыш лукмаште чот тырша. Кычалеш нуным чон йӯкшӧ дене! Юмыжак тудлан полша! Ойго ден йӧсылыкым йол йымак тошкалын, тудо эре у шӯлыш дене ила. Шукылан палыме мурьrзо-влак Надежда Васканова, Светлана Дмитриева, Татьяна Умурбаева да молат В.Осиповын мурыж дене тачат калык ончык лектыт.